السكر والجاز

أنا كنت قاعد فى البيت ومخنوق جدا لقيت (أبو علاء) بيرن عليه كالمعتاد بيرن بس وأنا أتصل بيه

المهم مطولش عليكم قولوا طول نزلت السنترال اللى جنب البيت أتصل بابوعلاء وراح فاتح عليه من أول رنه

قولتله خير يا عم عايز أيه ع المسا قالى أنت كمان واخد على خاطرك منى قولتله هو أنا واخد على خاطرى بس ده

ده انا واخد فى سنانى كمان ..... يا كلاب فى سنانى مش فى حته تانيه شعب نيته وسخه المهم يا سيدى ولا سيدك إلا أنا

قالى تعلالى على البيت عايز أتكلم معاك شويه أخدت بعضى وروحتله لقيت العسكرى اللى واقف على الباب يا عينى هيعيط

العكسرى ده صاحبى من زمان قولتله مالك يا فوزى قالى الحاج أبو علاء كل ما أقوله أنا عايز أقبض وأنزل أجازه يقولى

أنت شايف الحال واقف أزاى أصبر عليه يومين لما نلم السوق دخلت على أبو علاء لقيته بيشد مع الحاجه ام علاء وبيقولها

يعنى أعمل أيه اجيبلك أكل والشعب مش لاقى ياكل أصبرى لما المحنه دى تعدى وبعدين نبقى ناكل ولما شافنى قفل على الموضوع

وقالى ادخل يا طقطق يا خويا قصرك ومطرحك بعد ما قعدنا قالى أنت زعلان منى ليه؟ قولتله ليه انا زعلان عشان زيادة الأسعار الغريبه

دى ياراجل الناس مش لاقيه تاكل نعمل أيه بقى قالى أنت مش فاهم الناس فى مصر مش عاجبنى شغالين اكل وخلفه لحد ما البلد إتزحمت

والناس كمان تخنت قوى وقالى كمان. ياراجل يا طيب دى العربيات اليابانى اللى المفروض تشيل أربعتاشر نفر بتشيلهم دلوقتى مكربسين

فوق بعض طب نعمل أيه بقى وعمال أقول يا ناس بلاش اكل كتير وبلاش خلفه كتير ولا حد معبرنى ملقتش غير الحل ده انى اغلى الأكل

والشرب وأعمل للشعب (دايت إجبارى) يعنى رجيم مش رجيم زى إبليس رجيم يعنى يخسوا وقالى كمان لما الشعب يخس أبقى أرجع الاسعار

القديمه تانى قولتله طب والجاز الناس بتشربه هو كمان ولا بيتخن قالى لاء الجاز ده بتاع الميكروباصات والمواصلات والمواصلات لما

تغلى هى كمان الشعب هيمشى كتير ويخس بسرعه عارف يا طقطق يا خويا كلام بينى وبينك أنا محرم اللحمه تخش البيت يعنى أنا اكل

لحمه والشعب مش لاقى العيش ....... يا شعب يازباله الراجل بيفكر فى مصلحتكم وأنتم مش عاجبكم

كان معكم مراسلكم أبو طاقيه. المجموعه الشمسيه. كوكو الارض.أفريقيا.عزبة مبارك.مصر سابقا.من مستشفى مبارك للأمراض النفسيه والعصبيه .العباسيه سابقا عنبر تسعه ورا أوضة الكهربا بعد أبو أشرف بتاع الكبده...